Ameríski draumurinn endar vonandi vel

Kaup bandarísku auðkýfinganna George Gillett og Tom Hicks marka tímamót í enskri knattspyrnu. Liverpool er fornfrægt stórveldi, það sigursælasta í enskri knattspyrnu en hefur á undanförnum árum ekki getað keppt við Manchester United, Arsenal og nú síðast Chelsea.
Fjármagn hefur hamlað liðinu og það þurft að treysta á snilli knattspyrnustjóranna og Akademíunnar. Rafa Benitez kvartaði nýlega undan því að geta ekki keypt þá leikmenn sem hann langaði í og taldi þar meðal annars upp samkeppnina við Arsenal um bestu bitanna. En nú geta Liverpool-áhangendur farið að hlakka til. Nú styttist í að stórstjörnur hlaupi um Anfield eða Stanfield Park.
Mestu máli skiptir að bandarísku auðkýfingarnir hafa lýst því yfir að þeir hyggist halda í heiðri þeim anda sem ríkt hefur á Anfield þar sem knattspyrnan skiptir mestu máli. Sú staðreynd að þeir skipti ekki um menn í brúnni hefur kætt áhangendur Liverpool því síst af öllu vilja þeir að liðið verði ameríkanseruð útgáfa af Ambramovich-ævintýrinu.

Benítez og Parry áfram við stjórn hjá Liverpool